Янгиликлар

Эпидемиологик кўрсатма бўйича профилактик эмлаш нима дегани?

“Аҳолининг санитария-эпидемиологик осойишталиги тўғрисида”ги Қонуннинг 33-моддасига кўра (https://lex.uz/docs/2732587#2733111) Профилактик эмлашлар профилактик эмлашларнинг миллий календарига (тақвим) мувофиқ, шунингдек эпидемик кўрсаткичлар бўйича ўтказилади.

Ҳар бир давлатда юқумли касалликларга қарши эмлашни ташкил этиш тегишли тақвимга (жадвал) асосан амалга оширилади. Мазкур жадвалларда юқумли касалликларга қарши кимлар, қачон ва қайси пайтда эмланиши лозимлиги юзасидан кўрсатмалар акс эттирилади.

 Худди шундай, Ўзбекистон Республикаси Бош давлат санитария врачи томонидан юқумли касалликларга қарши эмлашни ташкил этиш юзасидан профилактик эмлашларнинг миллий календари (тақвими) ва Эпидемиологик кўрсатма бўйича профилактик эмлаш календари тасдиқланган.

Бугунги кунда профилактик эмлашларнинг миллий календарига (тақвимига) кўра профилактик эмлаш билан чақалоқлар 1-кунлигида ВГВ-1, 2–5 кунлигида БЦЖ-1, 2–4 ойлигида, 12 ойлигида, 16 ойлигида, шунингдек 6 ёшдан 16 ёшгача бўлган даврда турли хил юқумли касалликларга қарши иммунитет ҳосил қилиш учун эмлашлардан ўтказилади.

Шунингдек, Эпидемиологик кўрсатма бўйича профилактик эмлаш календарига кўра 13 та касаллик турлари бўйича келиб чиқиши мумкин бўлган эпидемиологик хавфнинг олдини олиш мақсадида, эмланиши лозим бўлган контингентлар рўйхати тасдиқланган.

 Хусусан, ушбу рўйхатда грипп, шол, қизамиқ ва қизилча, бўғма ва бошқа эпидемиологик касалликларга қарши эмланиши лозим бўлган контингентлар рўйхати белгиланган.

 Худди шундай, эпидемиологик вазиятдан келиб чиқиб коронавирусга қарши профилактик эмлаш ҳам Эпидемиологик кўрсатма бўйича профилактик эмлаш календарига киритилди.