Янгиликлар

Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби белгиланди

Ўзбекистон Республикаси адлия вазирининг 2021 йил 24 февралдаги
2-мҳ-сон “Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомни тасдиқлаш ҳақида”ги буйруғи белгиланган тартибда давлат рўйхатидан ўтказилди.

Унга кўра, норматив-ҳуқуқий ҳужжатлар ва улар лойиҳаларининг коррупцияга қарши экспертизаси ўтказилишининг янги тартиби белгиланди.

Шу муносабат билан, Қашқадарё вилоят адлия бошқармаси томонидан 2021 йил 11 март кунида “ZOOM” платформаси орқали семинар тренинг ташкил этилиб, унда туман (шаҳар) адлия бўлимининг масъул ходимлари, маҳаллий давлат ҳокимияти ҳамда вилоят даражасидаги давлат ташкилотларининг юридик хизмати ходимлари иштирок этди.

Семинар тренинг давомида бошқарманинг Ҳуқуқий экспертиза ва юридик хизматлар фаолиятини мувофиқлаштириш бўлими бошлиғи Т.Имомбердиев томонидан Ўзбекистон Республикасининг “Норматив-ҳуқуқий ҳужжатлар тўғрисида”ги Қонуни ҳамда Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомга асосан коррупциявий омиллар, лойиҳаларнинг ҳамда амалдаги норматив-ҳуқуқий ҳужжатларнинг коррупцияга қарши экспертизасини ўтказиш тартиби, шунингдек, коррупцияга қарши экспертизани ўтказувчи адлия органи ходимининг ҳуқуқ ва мажбуриятлари тўғрисида атрофлича маълумот берилди.

Тадбир давомида иштирокчилар берилган саволларига батафсил жавоб олдилар.