Янгиликлар
“Отчопар” маҳалласида сайёр қабул ташкил этилди
Қашқадарё вилояти туман (шаҳар) адлия бўлимлари томонидан ҳар бир ҳудудда шакллантирилган “Аёллар дафтари”га киритилган хотин-қизлар билан тегишли ташкилотлар ҳамкорлигида сайёр қабуллар ташкил этилмоқда.
30 ёшдан ошган ижтимоий, ҳуқуқий, психологик қўллаб-қувватлашга, билим ва касб ўрганишга эҳтиёжи ҳамда иштиёқи бор, шунингдек, бандлиги таъминланиши керак бўлган хотин-қизлар билан учрашувлар ташкил этилиб, уларнинг муаммоларини бартараф этиш, уларга ҳуқуқий маслаҳатлар бериш амалиёти тизимли равишда олиб борилмоқда.
Хусусан, Қарши шаҳар “Отчопар” маҳалласида ташкил этилган сайёр қабулда иштирок этган хотин-қизларга муаммолари юзасидан жойида ҳуқуқий тушунтириш берилди ва 3 нафар фуқаронинг мурожаати иш юритувига олинди.
Сайёр қабул давомида асосан туғилганлик гувоҳномаларини расмийлаштириш, кредит, пенсия ва нафақа олиш тартиби, бандлик масалалари юзасидан мурожаатлар келиб тушмоқда.