Янгиликлар

Сайловга тайёргарлик

Чироқчи туман адлия бўлими томонидан жойларда тарғибот тадбирлари ташкил этилиб, унда жорий йилда ўтказиладиган сайловга қисқа кунлар қолаётганлиги муносабати билан сайлов қонунчилигини аҳолига етказиш орқали, фуқароларнинг сиёсий ва ҳуқуқий билимлари ошириб борилмоқда.

Тумандаги “Гулистон” МФЙда ташкил этилган тадбирда маҳалла фаоллари иштирок этиб, унда Сайлов кодексига асосан сайлов жараёнларини тартибга солувчи қонунчиликда бир қатор муҳим ўзгаришлар назарда тутилганлиги таъкидланди.

Хусусан, ижтимоий хавфи катта бўлмаган ва унча оғир бўлмаган жиноятларни содир этган шахсларнинг сайловда иштирок этишини чекловчи нормалар чиқариб ташланганлиги, сайлов рўйхатига ўзгартириш киритиш ҳамда муддатидан олдин овоз бериш жараёнини сайловга уч кун қолганида тўхтатиш белгиланганлиги, илгари амалда бўлган меъёрий ҳужжатларга кўра, муддатидан олдин овоз бериш сайловга бир кун қолганда тўхтатилганлиги, сиёсий партиялар у ёки бу шахсни номзод этиб кўрсатиш тўғрисидаги қарорини сайловга кечи билан 15 кун қолганида бекор қилиш ҳуқуқига эга эканлиги тушунтириб берилди.

Кодексга асосан Халқ депутатлари вилоят кенгаши депутатлигига номзодларнинг ишончли вакилари сони 3 тадан 5 тагача кўпайтирилганлиги, номзоднинг яқин қариндошлари ва ишончли вакиллари номзодларга бўйсунувчи шахслар сайлов комиссиясининг аъзолари бўлиши мумкин эмаслиги белгиланганлиги, қонунчлик палатаси депутатлари сайловини ўтказиш учун 150 та ҳудудий сайлов округи тузилиши ҳамда илгари 135 та ҳудудий округ тузилган бўлиб, эндиликда, Ўзбекистон Экологик партияси ташкил этилганлиги боис, мазкур партия  депутатликка ўз номзодларини умумий сайловларга қўйган ҳолда қонунчилик палатасидан ўрин эгаллашлари мумкинлиги, шунингдек сайловчиларнинг ягона электрон рўйхати, участка сайлов комиссияси жойлашган биноларнинг жиҳозланиши, сайловларнинг ўтказилиши вақти тўғрисида ҳам батафсил сўз юритилди.