Янгиликлар

Коррупция – тараққиётга таҳдид

Қарши туман адлия бўлими томонидан туман Халқ таълими бўлимида мактабларнинг тарих ва ҳуқуқ фанлари ўқитувчилари, ёшлар етакчилари иштирокида “Коррупция – тараққиётга таҳдид” мавзусида тарғибот тадбири ташкил этилди.

Тадбирда бугунги кунда коррупция кўплаб давлатларда авж олганлиги дунё жамоатчилигини жиддий ташвишга солаётганлиги, ана шундай бир шароитда мансабдор шахсларнинг жиноятчилар билан тил бириктириши натижасида жамият сиёсий ва иқтисодий инқирозига юз тутиши мумкинлиги, инсон ҳуқуқ ва эркинликларининг поймол бўлишига олиб келиши таъкидланди.

Шунингдек, коррупцияга қарши кураш, уни келтириб чиқарувчи ҳолат ва сабабларни бартараф этиш, жамиятда, айниқса ёшлар онгида коррупцияга қарши мустаҳкам иммунитетни ҳамда муросасиз муносабатни шакллантириш бугунги куннинг долзарб вазифаси эканлиги, бу борада давлатимиз томонидан олиб борилаётган чора-тадбирлар, шунингдек “Коррупция тўғрисида”ги Қонуни мазмуни ва моҳияти юзасидан тушунтиришлар берилди.

Тадбир сўнгида иштирокчилар ўзларини қизиқтирган саволлар билан мурожаат қилдилар.