Янгиликлар

Ер участкаларини компенсация эвазига жамоат эҳтиёжлари учун олиб қўйиш тартиби белгиланди

Сўнгги йилларда республикамизда ерга оид мулкий ва ҳуқуқий муносабатларда барқарорликни таъминлаш, ер эгаларининг мулкий ҳуқуқларини кафолатлаш борасида тизимли чора-тадбирлар амалга оширилмоқда.

Ер участкаларини жамоат эҳтиёжлари учун олиб қўйишда жисмоний ва юридик шахслар мулкий ҳуқуқларининг ҳимоя қилиниши қонун даражасига чиқарилиб, уларнинг кафолатларини кучайтириш мақсадида 2022 йил 29 июнда Ўзбекистон Республикасининг “Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида” ги қонуни қабул қилинди.

Мазкур ҳужжат билан Вазирлар Маҳкамасининг “Давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича марказлаштирилган жамғармалар маблағларини шакллантириш ва улардан фойдаланиш тартиби тўғрисида низомни тасдиқлаш ҳақида” ги қарорига қуйидагиларни назарда тутувчи қўшимча ва ўзгартиришлар киритиш назарда тутилди.

Хусусан, ер участкаларини жамоат эҳтиёжлари учун олиб қўйиш соҳасига оид айрим тушунчаларга аниқлик киритиш ҳамда Ўзбекистон Республикаси Вазирлар Маҳкамаси ҳузурида Ер участкалари жамоат эҳтиёжлари учун олиб қўйилиши муносабати билан зарарларнинг ўрнини жисмоний ва юридик шахсларга қоплаш бўйича марказлаштирилган жамғарма ва Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида Ер участкалари жамоат эҳтиёжлари учун олиб қўйилиши муносабати билан зарарларнинг ўрнини жисмоний ва юридик шахсларга қоплаш бўйича марказлаштирилган жамғармалар маблағларидан фойдаланиш тартибини аниқлаштириш масалалари белгилаб берилди.

Шунингдек, ушбу қонунда ер участкалари жамоат эҳтиёжлари учун олиб қўйилиши муносабати билан зарарларнинг ўрнини жисмоний ва юридик шахсларга қоплаш бўйича марказлаштирилган жамғармалар ташкил этилиб, уларда шакллантирилган маблағлардан фойдаланиш тартиблари ҳам белгиланди.

Қонун билан ер участкаларини компенсация эвазига жамоат эҳтиёжлари учун олиб қўйиш ва ҳуқуқ эгалари билан келишув тузиш, ҳуқуқ эгалари билан очиқ муҳокама ўтказиш, ер участкаси олиб қўйилиши муносабати билан бериладиган компенсация турлари ва манбалари ҳамда компенсация бериш тартиби ва муддатлари аниқ белгилаб берилди.

Жаҳонгир Норов,

Қашқадарё вилояти адлия бошқармаси

Ҳуқуқни қўллаш амалиётини

ўрганиш бўлими етакчи маслаҳатчиси